另類family day: VR拍攝隨團小助手

以前細個喺公屋長大，好多時落到商場或者途經大排檔，都會見到小朋友跟着父母一齊開工。如果未做晒功課嘅，有啲就會開張摺檯喺度做功課，做完功課嘅話就會喺檔口幫手打點一切。呢個應該係公屋常見嘅情況，文具舖、雜貨鋪，甚至乎牛雜粉麵舖，都會見到有小朋友嘅出沒同埋幫手。依家時代唔同左，小朋友感覺矜貴左，
唔好講話可以幫父母開檔做生意幫手，其實好多時而家小朋友仲忙過父母。

以前我哋返學只係返上晝班或者晏晝班，而家佢哋放學就要趕住去唔同嘅補習班，做功課溫書，學唔同嘅野。當你以為星期六，星期日有空餘嘅時間，就真係諗多咗啦，星期六同日，好多小朋友嘅時間表更加係排到密麻麻，真係一日走五場都有，去到邊度都會聽到家長話：食快啲啦、行快啲啦、就夠鐘啦！

今日好開心，VR外景拍攝嘅預備工作中，可以帶埋女兒一齊外出，大人負責背負沉重嘅器材，女兒就負責隨行打點一切。
由於影片係拍俾長者觀看，所以我哋拍攝嘅時候都有一齊討論，如何拍攝係最好，我哋一齊上昂坪，再行上大佛，拍攝左好多唔同嘅角度。

今日可以話係一個工作天，亦可以係一個親子活動嘅時間，我發覺原來小朋友好珍惜可以有機會同爸爸媽媽一齊工作，因為呢一樣野係佢哋好少可以參與得到，而我哋嘅角色通常就係返屋企問佢：做晒功課未？今日嘅拍攝過程，當佢發覺佢自己可以投入、發問、參與係其中嘅時候，佢都感到好興奮。