Q版管理 – 展翅高飛了

11年前的某日，經理介紹了一位展翅畢業的學生給我認識，跟著說：佢起碼會跟您一年。在沒有選擇的情況下，從那天起，我們坐同一間房，他第一句說話：『亞頭，有咩做出聲得啦。』
 
某天上班，遲到，第一眼見佢，忍唔住問：您咩事呀? 唔係打交呀?
 
佢啖定咁回應：係呀，沉晚響九龍灣果邊，冇野嘅，佢地人多D姐，我會操返fit D，我呆左唔識回應。
 
有一次我叫佢幫手打份文件，結果佢打完俾返我，錯誤率都好高下，我反問：點解咁多個字都打錯嘅? 佢又回答：亞頭，您之前叫我打姐，都冇叫我要打啱。
 
11年前嘅我，真係忍唔住大笑左出黎，自此之後，我叫親佢做任何野，都會加多句，要快、而準啊!
 
再過一個月，見到佢日日都唔出街食，只係食幾隻雞蛋同雞胸肉，每日如是。食完野佢仲會去廁所刷牙加漱口，我忍不住又問：您又搞咩呀? 佢大聲地回答：亞頭，我想去考消防呀，所以要努力同堅持。
 
今次我當然都笑左出黎，同佢講：唔係呀? 您考消防? 唔該您唔好去搞搞震啦。無端端做咩要去考消防? 佢答得好快：亞頭，消防溝女型D嘛。
 
我就話：您咁諗，實考唔到啦。
 
年幾內，佢就咁跟住我上山下海，在山上黑雨都經歷過，一齊開班帶展翅嘅師弟妹，從無怨言。
 
如是者，以我依稀記得，一次、兩次嘅消防試都不合格，直至有一次，他打電話給我：亞頭，我又去考啦。每次我都問：今次您為咩考? 佢竟然唔再答我之前嘅答案，佢今次停左一秒，然後話：亞頭，我諗，我真係鍾意做消防呀。
 
大家應該估計到之後嘅劇情，過了幾個月又有一把熟悉嘅聲音：亞頭，我入Camp啦。
 
最近在FB看到您嘅近況，大個仔，要結婚了。
 
多謝您，亞九，同您相處嘅日子雖然係好短，但您也教曉我很多，起碼您俾我親眼看見了：堅持信念，展翅高飛
 
<曾子怡撰文之Q版管理系列>