2h StartUp – re start Maggie

[2h StartUp – re start Maggie]
認識Maggie已經係95年嘅事,響一個坐兩百幾人嘅Lecture Hall入面,製造工程系有超過90%係男生,我就搵到有一個仙氣女子嘅存在。畢業後好大部份嘅同學都係入廠做,或多或少同工程/設計有關,Maggie都唔例外,兩年中港兩邊走。之後做咩? 要還自己一個心願,由細到大嘅一個記者夢,點解咁想做記者? 因為好希望亦相信可以將『事實』寫出黎,由零亦由低做起,輾轉七年間嘅記者生涯分別做過美容、結婚雜誌、網媒等有關工作。離開了之後,又作出截然不同嘅新嘗試,由記者變成秘書,一做又做左五年,雖然過住7X24嘅生活,不過當中拼命嘅付出同努力都換黎好大成功感!
人生,總有一些人或事會令您急促嘅步伐停一停去思考人生,Maggie都唔例外,事情接二連三地發生,大半年間,從毅然放棄一份很熱愛的工作,轉投新工作後卻發現不適合,然後視作家人的愛犬病重,接著摯親離世,下一刻時愛情破裂,經濟陷入困境,一個人承受著所有感受。有一年半時間,每日情緒都非常低落,無法控制喪喊,開始由勁食,過左一段時間變成唔食,最後發覺精神上的負重太大,辭去了工作。當時面對不但有家人及朋友嘅眼光,有時甚至連自己都接受唔到自己係咁。
外人聽到可能會話:發生左咩事? 駛唔駛咁誇張呀? 不過親耳聽Maggie講返當中嘅經歷,我體會到一樣野,您唔係當事人,盡量唔好成日用您果套,套落人地身上。在Maggie口中好坦率咁講,佢有一刻開始察覺:自己係咪有抑鬱症? 坦白講我好欣賞佢嘅勇氣,艱難嘅日子,好艱難咁過去之後,陽光果然出來了。
心情平靜過後,一個人要從頭黎過,有一個信念,成立左『re start』,好似電腦咁,re start係一個休息嘅機會,Maggie嘅信念係,人生都可以re start,希望大家都唔好輕言放棄目標,今日失敗左,瞓一覺,聽日又再黎過。同樣地re start 都代表緊一種生活模式同態度,身心都要健康,亦可以過得綠色一點。所以re start係會堅持成品要有效、天然純淨、對人、甚至對動物及環境都不造成傷害。
Maggie花了好多心機、時間去學習點可以製造出健康嘅產品,每一件都用心去研究,佢家下做緊嘅野,唔一定好多人會認同,因為看似唔係賺大錢,不過我望見Maggie嘅笑容,真心、感動人心。
2H Start up Maggie語錄:搏命做野去賺錢,衣食唔需要擔心,不過望返自己最開心,內心感到富足嘅時間,好似係最窮果段日子。
Maggie, 您走過嘅每一段路都係好有用,為左裝備您之後更精彩嘅人生,我深信上天會祝福您!
#2hstartup #restart #2h
 

About the Author