Sorry, you need to enable JavaScript to visit this website.
移至主內容

自然養生 - 杞子藍莓士多啤梨汁

一直有追讀我養生文章嘅朋友應該仲記得我有每朝飲果汁嘅習慣,一杯杯又暖又杰嘅36°養生果汁,連皮打奇異果汁、補血養顏嘅紅菜頭汁,呢兩款都未算特別,今次介紹一款大家絕少想到可以用來打果汁嘅材料─杞子! 杞子,學名叫枸杞子,平時除左煲湯,仲可以用來泡茶,將8-10粒杞子用水沖洗過,同菊花一齊放落保暖杯內,用大滾水焗10分鐘,最適合口乾舌燥、輕微熱氣時飲用,我習慣首先將杞子逐粒逐粒咀嚼,之後再慢慢嗒真已出晒味嘅杞子菊花茶!

喺《本草綱目》中稱杞子有滋補肝腎、潤肺、明目作用,其實補肝腎可以話由3歲到80歲都需要! 杞子打汁嘅方法係:用杞子10粒、藍莓20粒、士多啤梨5-6粒,打出嚟嘅果汁顏色靚不在講,最緊要係完全符合中西養生保健理論! 杞子養肝,又有明目作用,中醫五臟六腑係一家人,肝與目更係同一個家族成員,就好似我地平時見到肝胆有病、眼白轉黃;肝火盛、眼又會現紅筋,就會體驗到我所講嘅關係! 杞子養肝明目,同樣地藍莓亦被認同對護眼及改善視力有幫助,再加埋酸咪咪有抗氧化、美白效果嘅士多啤梨,酸味食物入肝,五味入五臟,肝與目又有互相補足作用,因此選擇呢三種材料一齊打出嚟嘅果汁,唔單止味道好,效果更好! 特別係女士成日好易發炆憎,原來叫做肝氣鬱結,呢款杞子藍莓士多啤梨果汁,除左抗氧化、護眼,對舒肝解鬱一樣極之適合!