生命麵包：鐵三角的回憶

煉奶、花生醬、麵包，呢個係無敵鐵三角組合。同事見到呢個鐵三角組合，都會作出唔同嘅反應，但係佔大部份都會問一句：使唔使搞成咁? 呢個鐵三角組合，對我來講有一個好特別嘅意義，應該話係一個美好嘅回憶。

細個住喺屯門一個公屋，我記得成日同媽媽去買餸，好多時會經過冬菇亭、茶水檔，最開心每次就係喺茶水檔嗰度食奶醬包。我記得嗰個哥哥成日問我要唔要奶醬多，坦白講...其實我唔係好明佢講乜嘢? 到後來先至明原來奶醬多即係多士，其實我有啲想食，不過當我知道奶醬多要加錢嘅時候，我就話都係奶醬包好味啲，除咗奶醬包，另一樣野令我充滿回憶嘅，就係好耐不耐可以叫一次忌廉溝鮮奶飲，雖然唔係成日都有得飲，但係呢一種感覺令我更加珍惜。

我發覺，原來味道都係記憶嘅一部份，當我每次食奶醬包嘅時候，都會會心微笑。當然食奶醬包真係可以慳錢，但係我發覺呢個鐵三角組合係會令我食得好開心。

以前後生，好鍾意去食自助餐，會為咗果晚去食自助餐而感到興奮。而家發覺人大左，唔知係咪食嘢要求低咗，定係太慳家? 開始發覺原來簡簡單單就一餐都幾開心，應該咁講，係已經滿足。
我覺得嗰份滿足感有小部份係來自食物同埋回憶，但係最主要係你同邊個人一齊食。老土啲講句，如果同某啲人一齊食，可能真係鹹魚白菜也好好味。

唔知係你生命入邊又有邊啲食物嘅回憶?
會唔會係一碗豬紅粥、艇仔粥、白糖糕、牛脷酥?
希望大家嘅人生下半場，都過住 #心中富有，滿足嘅日子，呢個就係 #亞Q態度

如果想知更多健康生活小貼士, 記得訂閱 [Sonia亞桑]Channel, 同埋要hit the notification bell, 咁就收到最新消息啦，Click in: https://bit.ly/34H3Gfx

立即網上購物：www.2h-store.com

如果想知更多健康生活小貼士, 記得訂閱 [Sonia亞桑]Channel, 同埋要hit the notification bell, 咁就收到最新消息啦，Click in: https://bit.ly/34H3Gfx